一文睇清,一文睇晒,一文真係睇清晒?成個閱讀文化俾你搞彎晒。

我地成日睇到香港地好多講得好聽係資訊網,講得唔好聽係 content farm 嘅專頁經常做好多一頁紙長度懶人包,閒閒地都幾萬甚至幾十萬 followers。下下落標顯都係「一文睇清」丶「一文睇晒」,冇第款,但對習慣速食文化嘅香港人嚟講依啲標題又真係落得好準好受落。


「一文睇清」啲文章,全部都係社會近期熱話,十有八九都係左抄右抄而成之物,有一半以上都係未經證實嘅資料,如果你真係該篇文章內容範疇嘅人,其實你一睇就知好多都係流料,一係就是是但但,一係就兜個圈賣緊廣告。

咁又唔怪得個平台,因為香港人就係要依啲,睇最少嘅字,花最少時間,去知道佢想知嘅嘢,又或者最 Juicy 嘅嘢,但就不求甚解嘅。而個寫手打份工,一日又要寫好多篇必須吸引到人點閱嘅文章,唔好話 fact check,連有冇打錯字都冇時間 check。

更唔好話同原文出處拎授權,唔拎授權都算,連落個 reference 都懶,連改少少字都慳返,typo 都照 copy and paste。但好笑嘅係,如果佢落左 reference 連返落原文度,竟然會記得加返 no-follow,少少 SEO 分數都唔益你。
(給唔知咩係 no-follow 同 SEO 嘅讀者,一句睇清 SEO:影響一個網站喺搜尋器搜尋關鍵字時排名嘅要素,點解你下下 search 嘢都頭幾個都見到大平台內容,就係因為佢地 SEO 做得好足,與內容是否正確高質無必然關係。)

雖然自問唔係咩高質內容生產者,小弟都有幸被大平台不問自取過,但最終我改咗自己篇原文部份內容,因為後來發現自己寫錯嘢,結果抄手當然唔會知,唔會改返,但依啲大平台受眾基數大,SEO 分數高,佢擺到明抄你文,接觸率同搜尋排名都一定會比你高,然後將錯誤資訊繼續散佈出去。如果你衝出黎糾正佢?等住俾佢班 fans 圍插你扮專家啦!

而被 SEO 擊敗,淨係寫自己專長嘅原創寫手,時間花咗,點閱冇晒,錢送晒俾大平台,知名度累積唔到,如何生存?

原創賺唔到錢,抄手打份工,點閱丶收入丶知名度都落晒啲專業炒熱度但乜都係業餘嘅所謂資訊平台,所以就係點解香港人會覺得香港少人製作高質專業嘢,因為高質嘢你睇唔到,你唔知道。

香港人睇完一文睇清之後以為自己真係清楚晒,唔再去搵去睇得更深入。最後製作專業內容嘅人冇資金而再做唔出咩高質嘢,更加因為搵唔到食而愈來愈少人做。

睇依啲平台嘅一文睇清,就好似一個唔識嘅人同你講佢都唔識嘅嘢,你唔係以為自己真係可以一文睇清楚晒下話?

近排你睇咗幾多篇一文睇清嘅 BNO 移民英國資訊?你睇清未?

0 Comentarios:

張貼留言